ERREPIDEAK

Markina-Xemeingo gazte bat hil da bi autok elkar jo ostean

Markina-Xemeingo 24 urteko mutil gazte bat hil zen herenegun 20:40an Bi-633 errepidean, Markina-Xemein parean, gertatutako istripuan. Bi autok elkar jo zuten eta Markina-Xemeingo gaztea autoan harrapatuta geratu zen. Suhiltzaileek autotik atera zuten, baina bertan hil zen. Beste autoko gidaria, 37 urteko emakume bat, zauritu egin zen eta Galdakaoko ospitalera eraman zuten.

Eusko Jaurlaritzak bertan behera utzi du Neguko Bideragarritasun Plana

Eusko Jaurlaritzako Trafiko zuzendaritzak bertan behera utzi zuen atzo Neguko Bideragarritasun Plana, «aurreikusi den eguraldiaren hobekuntzagatik». Trafiko zuzendaritzak ostegunean bertan jarri zuen indarrean Neguko Bideragarritasun Plana.

EGURALDIA

Alerta egoera bukatutzat eman dute Hegoaldean

Espainiako Babes Zibilerako Zuzendaritzak atzo amaitu zuen elurte eta haizete arriskuagatik Hego Euskal Herrian indarrean zegoen alerta egoera.

GERTAKARIAK

Hiru lagun atxilotu dituzte Bilbon, gazte bati erasotzeagatik

Ertzaintzak 20 urte inguruko hiru gazte atxilotu zituen atzo Bilbon, beste bati erasotzeagatik. Ertzainak iritsi zirenean, hiru gazteak beste bati ukabilkadak eta ostikoak ematen ari ziren Bilboko Irala kalean. Jipoitu zuten gazteak zauri bat zuen eta osasun zerbitzuen laguntza behar izan zuen. Gazteek labana bat, cuter bat eta hautsitako botila lepo bat zuten. Ertzaintzak atxilotu egin zituen.

Donostiar bat atxilotu dute, ustez gasolindegi berean bi aldiz lapurtzeagatik

Ertzaintzak donostiar bat atxilotu zuen aurreko ostiralean, ustez bi hilabetean gasolindegi berean bi aldiz lapurtzeagatik. Gasolindegiko lapurretak urriaren amaieran eta abenduaren 30ean egin zituzten eta Ertzaintza ikertzen ari zen.